[نظم]تم کو مبارک ہو نیا سال

 •{سیارہ زمین آدم زاد کو سالِ نو کی مبارکباد دیتی ہے)•

[نظم]

تم کو مبارک ہو نیا سال....

زمیں زاد مرے..

نئے سال کے خواب نئے

ان خوابوں سے وابستہ

سارے ملال

اے عمر زاد، زمیں زاد مِرے۔۔

جس طرح تو ہے پابندِ سلاسل،

گردشِ ایام کی روٌش کا

ٹھیک اسی مانِند

طوافِ شمس پہ مجبور میں ہوں

جس طرح کہ تو ہے گرفتار،

دائرہ ءِ ماہ و سال و عُمر کے بیچ

اسی مانند آغوشِ فلک میں

پابندِ سفر و خوار میں ہوں

مگر تجھ کو نہیں ہے علم کہ اس جہانِ فانی کی

حدودِ زمان و مکاں کے بیچ

جو آزاد نظر آتا ہے، وہ آزاد نہیں ہے۔۔

اے عُمر زاد، زمیں زاد میرے۔۔

وہ میں ہوں، تم ہو ۔۔،

کہکشاں کے تارے ہوں یا ذرے کا دل ہو

ہر شخص ہی خواہش کے حصار میں بند ہے۔۔۔

ہر ذی ہی گرفتار ہے ہر شے ہی مقیّد ہے

یہی کششِ خواہش کی حرارت ہے حیات۔۔

یہی گرمی ءِخواہش ہے

کششِ ثقل و وفا کا سبب

اسی گرمی ء تمنا سے ہے روشن

سینہ ءِ سورج کا چراغ

وہ سورج کہ جہاں میں

جو کعبہ ہے مِرا اور

تیری دنیا کا اجالا۔۔۔

تم کو مبارک ہو نیا سال کہ تو

سالِ گزشتہ کی پر سوز ،

سنگسار رُتوں سے بچ کے نکلا ہے

تم کو مبارک ہو نیا سال کہ تو

ساعتِ حیات و موت کے

عہدِ جبر میں جکڑا ہوا۔۔۔

امیدِ سال نو کے افق پر

خوابِ آزادی کا خواہاں ہے۔۔۔!

وقاص صارم